اليوم عجبني على غير العادة .. فقلت اديكم خبر

لأول مرة على المستوي الشخصي أحضر حدث أو احتفال و ميبقاش فوق ال70% منه مجاملات و نفاق
انهاردة او 28\4 عملت جامعة سوهاج احتفالية جميلة فعلاً تكريماً لروح الراحل الشيخ محمد سيد طنطاوى شيخ الأزهر الراحل
نظراً لأنه من أبناء سوهاج و زى ما وصفه كتير من الضيوف بالإبن ( البار )و من وجهة نظرى هو فعلاً يستحق اننا نفتحر بيه و بكونه سوهاجى الأصل
الشيخ طنطاوى بإختصار : للمسلمين كان عالم محترم و وسطي و معتدل
و للمصريين كلهم كان رجل سلام .. أعتقد انه استحق يترشح لجائزة نوبل للسلام زيه زي آخرون لكن ما علينا .. لأننا دايماً نفتكر نكرم الرموز بعد ما فقدانهم

و من آخر مواقفه الرائعة : أحداث نجع حمادى الأخيرة
نزل نجع حمادى يوم الجمعة اللى بعد الحادث على طول و ألقي خطبة الجمعة عن السلام و عن التآخى و يعني إيه وطن .. في كلام قليل بس حقيقي جداً

الحقيقة الشيخ طنطاوى إستحق بجدارة دموع اخوه اللى كان حاضر و كان على المنصة مع الضيوف و كان بيبكي طول الوقت !
و إستحق برضه إن نجيب ساويرس اللى نور الجامعة فعلاً انهاردة ( الراجل ده طلته ترد الروح) المهندس نجيب بمجرد ما اعتلي المنصة و أعلن انه هيتكلم ( بالمصري الفصيح ) مش بالفصحي زي الكل .. دموعه حضرت بشكل أبكي الحضار كلهم و الحقيقة ناس كتير من مشاعره اتأثرت و بكت !

ساويرس من غير تأويلات ولا تفسيرات ع المزاج قال : انا بعتبر الشيخ طنطاوى ( قديس ) لأنه رجل وصل لدرجات عالية من البر .. و لما حضرت دموعه اوى ختم : رحمه الله و رجع مكانه من سكات

الحقيقة ذهلنى الحضور الكــبـيـر من طلاب الجامعة و برضه على غير العادة .. كانت حاجة تفرح و كانوا متحمسين جداً لساويرس و كل كلمة يقولها ولا لما حد يجيب سيرته الشباب بينفعل بشكل رائع
انا مبسوطة صدقونى


في حدث كمان جميل و إطلاق رائع من الجامعة و رجل الأعمال المهندس نجيب ساويرس .. قرروا إطلاق جائزة في السلام بإسم الشيخ محمد سيد طنطاوى ( جائزة عالمية ) قيمتها لا تقل عن 100 ألف جنيه مصري .. مادياً الجائزة يرعاها ساويرس و أدبياً ده إختصاص الجامعة
رغم تفسيرات و توقعات كتير سمعتها عن الجائزة بعد الإحتفال لكن انا سعيدة بالتكريم المحترم للشخص الراحل اللى فرق مع ( تقريباً ) كل المصريين

يلا بقي نمد الخط الاسود عشان ننزل للسلبيات :)
_________________________________________

هى مش سلبيات قد ما هى ملاحظات شخصية و يمكن تكون عامة ..

أولاً : السيد المهندس نجيب ساويرس توقعت إنه بعد الإحتفال و التكريم للشيخ الراحل هيتكلم في مجاله بقي .. يعني يقعد يحكي مع الشباب عن البيزنس عن التعليم عن الحياة عن خبرات شخصية .. كدة يعني ، لكن ده محصلش .. و انا اضايقت

ثانياً : كان معانا صحفية ألمانية ( الحقيقة امورة ) تعامل الناس معاها كان شيء مشين ، الناس ( الطلبة المتعلمين ) بيصوروها كأنها تحفة !
و كل ما نمشي في حتة حد يقولها : لو سمحتى ممكن صورة ؟؟
اللطيف بقي إنها بتتكلم عربي و مصري بشكل طلق جداً ، فقالت لواحد من الشباب : هتحطها بقي على فيس بوك و تكتب تحتها كلام و كدة !؟؟

و أحد الفتيات القرويات كللت الختام بأنها مسكت شعر اختنا الأجنبية .. يمكن كانت عاوزة تسألها ع الشامبو اللى بتستعمله !؟


ثالثاً : الحضار الكرام أعضاء هيئة التدريس و العاملين بالجامعة ختموا الإحتفال بشكل معجبنيش .. و معجبش ناس كتير
بمجرد ما ختم آخر متكلم كلمته هوب كلهم قامو و بيتدافعوا بالشكل المصري الحضارى الجميل ع الباب عاوزين يخرجوا .. و مقدمين الحفل يا جماعة لو سمحتوا لسة في تكريم و في قرآن .. لا حياة لمن تنادى

تقريباً هما السلبيتين الاخيرتين يدخلوا نطاق علم المصريات كالعادة .. لكن المهندس نجيب مش عارف بس غريبة !


___________________________________

آه و بالمناسبة في ورشة راديو شغالة في الجامعة و استنوا تغطيتها بكرة ( مدربين من معهد جوتة الألمانى ).. حاجة تفرح يا ولاد


Bent Elnaggar ..

لازال هناك ما لم يُدوّن بعد ..